Type Here to Get Search Results !

ਕਿਸਾਨੀ ਘੋਲ ਦਾ ਅਸਲੀ ਹੀਰੋ ਸ਼ਹੀਦ ਜਸਵਿੰਦਰ ਸਿੰਘ ਨੰਦਗੜ੍ਹ

ਕਿਸਾਨੀ ਘੋਲ ਦਾ ਅਸਲੀ ਹੀਰੋ ਸ਼ਹੀਦ ਜਸਵਿੰਦਰ ਸਿੰਘ ਨੰਦਗੜ੍ਹ
ਸ਼ਹੀਦ ਜਸਵਿੰਦਰ ਸਿੰਘ ਨੰਦਗੜ੍ਹ ਕਿਸਾਨੀ ਘੋਲ ਦਾ ਅਸਲੀ ਹੀਰੋ ਹੈ ਤੇ ਆਪਣੇ ਮੂੰਹੋਂ ਕਹੀ ਹੋਈ ਗੱਲ ਉਹ ਪੁਗਾ ਗਿਆ ਕਿ ਜਦੋਂ ਤੱਕ ਖੇਤੀ ਵਿਰੋਧੀ ਕਾਨੂੰਨਾਂ ਨੂੰ ਕੇਂਦਰ ਸਰਕਾਰ ਰੱਦ ਨਹੀਂ ਕਰਦੀ ਉਹਨਾਂ ਚਿਰ ਉਹ ਆਪਣੇ ਘਰ ਵਾਪਸ ਨਹੀਂ ਜਾਵੇਗਾ । ਜਸਵਿੰਦਰ 24 ਨਵੰਬਰ 2020 ਨੂੰ ਪਿੰਡ ਨੰਦਗੜ੍ਹ ਤੋਂ ਕਿਸਾਨਾਂ ਦੇ ਪਹਿਲੇ ਜਥੇ ਨਾਲ ਤੁਰਿਆ ਸੀ ਤੇ 26 ਨਵੰਬਰ ਨੂੰ ਦਿੱਲੀ ਟਿਕਰੀ ਬਾਰਡਰ ਉਤੇ ਜਾ ਡੇਰੇ ਲਾ ਲਏ ਸਨ । ਉਦੋਂ ਤੋਂ ਲੈ ਕੇ ਉਹ ਘਰ ਵਾਪਸ ਨਹੀਂ ਆਇਆ ਸੀ । ਬੜੇ ਅਫਸੋਸ ਦੀ ਗੱਲ ਹੈ ਕਿ 19 ਨਵੰਬਰ ਨੂੰ ਇੱਕ ਪਾਸੇ ਦੇਸ਼ ਦਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਖੇਤੀ ਵਿਰੋਧੀ ਕਾਨੂੰਨਾਂ ਨੂੰ ਰੱਦ ਕਰਨ ਦਾ ਐਲਾਨ ਕਰਦਾ ਹੈ ਤੇ ਦੂਜੇ ਪਾਸੇ ਉਸੇ ਦਿਨ ਜਸਵਿੰਦਰ ਸਿੰਘ ਨੰਦਗੜ੍ਹ ਨੂੰ ਦਿਲ ਦਾ ਦੌਰਾ ਪੈ ਜਾਂਦਾ ਤੇ ਉਹ ਸਦਾ ਲਈ ਇਸ ਦੁਨੀਆਂ ਤੋਂ ਕੂਚ ਕਰ ਜਾਂਦਾ ਹੈ । ਜਸਵਿੰਦਰ ਕਿਸਾਨੀ ਸੰਘਰਸ਼ ਲਈ ਬਹੁਤ ਵੱਡੀ ਕੁਰਬਾਨੀ ਦੇ ਗਿਆ ।  
         
ਕਿਸਾਨੀ ਘੋਲ ਦਾ ਅਸਲੀ ਹੀਰੋ ਸ਼ਹੀਦ ਜਸਵਿੰਦਰ ਸਿੰਘ ਨੰਦਗੜ੍ਹ
ਜ਼ਿੰਦਗੀ ਦੇ 55 ਵੇਂ ਵਰੇਂ ਵਿਚੋਂ ਲੰਘ ਰਿਹਾ ਜਸਵਿੰਦਰ ਸਿੰਘ ਬੜਾ ਮਿਲਣਸਾਰ , ਮਿੱਠਬੋਲੜਾ ਤੇ ਹਰ ਇੱਕ ਨੂੰ ਪਹਿਲੀ ਮੁਲਾਕਾਤ ਵਿੱਚ ਹੀ ਆਪਣਾ ਬਣਾ ਲੈਣ ਵਾਲਾ ਹਿੰਮਤੀ ਇਨਸਾਨ ਸੀ ।‌ ਕਿਸਾਨੀ ਸੰਘਰਸ਼ ਦੀ ਉਹ ਜਿੱਤ ਕਰਵਾ ਗਿਆ , ਪਰ ਆਪਣੀ ਜਾਨ ਦੀ ਬਾਜ਼ੀ ਤੋਂ ਆਖ਼ਰ ਹਾਰ ਗਿਆ ਤੇ ਹੁਣ ਉਸ ਦੀ ਮਿਰਤਕ ਦੇਹ ਹੀ ਪਿੰਡ ਨੰਦਗੜ੍ਹ ਆ ਰਹੀ ਹੈ ਤੇ 21 ਨਵੰਬਰ ਦਿਨ ਐਤਵਾਰ ਨੂੰ ਸਵੇਰੇ 11 ਵਜੇ ਪਿੰਡ ਨੰਦਗੜ੍ਹ ਵਿਖੇ ਉਹਨਾਂ ਦਾ ਅੰਤਿਮ ਸੰਸਕਾਰ ਕੀਤਾ ਜਾਵੇਗਾ । ਸਾਰਾ ਇਲਾਕਾ ਸੋਗ ਵਿੱਚ ਡੁੱਬਿਆ ਹੋਇਆ ਹੈ ਤੇ ਹਰ ਅੱਖ ਨਮ ਹੈ । 

              ਜਸਵਿੰਦਰ ਸਿੰਘ ਨੰਦਗੜ੍ਹ ਨਾਲ ਮੇਰੀਆਂ ਬਹੁਤ ਸਾਰੀਆਂ ਯਾਦਾਂ ਸਾਂਝੀਆਂ ਹਨ ਤੇ ਅਸੀਂ 1984-85 ਤੋਂ  ਲੈ ਕੇ ਇਕੱਠੇ ਰਹੇ ਹਾਂ ।‌ ਖਾੜਕੂ ਲਹਿਰ ਦੌਰਾਨ ਵੀ ਉਹਨਾਂ ਨੇ ਚੰਗਾ ਰੋਲ ਅਦਾ ਕੀਤਾ । ਫੈਡਰੇਸ਼ਨ ਦੀਆਂ ਸਰਗਰਮੀਆਂ ਵਿੱਚ ਹਿੱਸਾ ਲਿਆ । ਸਾਹਿਤ ਤੇ ਸੱਭਿਆਚਾਰ ਨਾਲ ਵੀ ਉਹ ਚੰਗਾ ਲਗਾਵ ਰੱਖਦਾ ਸੀ । ਸਾਡੇ ਨਾਲ ਸੱਭਿਆਚਾਰਕ ਮੇਲਾ ਕਰਵਾਉਣ ਸਮੇਂ ਮੱਦਦ ਕਰਦਾ ਰਿਹਾ ਹੈ । ਕਲਾਕਾਰਾਂ ਨੂੰ ਮਿਲ ਕੇ ਬੜਾ ਖੁਸ਼ ਹੁੰਦਾ ਸੀ । ਮੈਂ ਬਹੁਤ ਸਾਰੇ ਕਲਾਕਾਰਾਂ ਨੂੰ ਮਿਲਾਇਆ । ਦਿੱਲੀ ਬੈਠਾ ਵੀ ਮੈਨੂੰ ਜਿਥੇ ਸੰਘਰਸ਼ਾਂ ਦੇ ਪ੍ਰੋਗਰਾਮਾਂ ਦੀਆਂ ਫੋਟੋਆਂ ਭੇਜਦਾ ਰਹਿੰਦਾ ਹੈ ਉਥੇ ਨਾਲ ਹੀ ਜ਼ਰੂਰ ਪੁੱਛਦਾ ਕਿ ਫਲਾਣੇ ਕਲਾਕਾਰ ਦਾ ਕੀ ਹਾਲ ਆ । ਜਦੋਂ ਮੈਂ ਜੰਗ ਜਿੱਤ ਕੇ ਵਾਪਸ ਪਰਤਿਆ ਤਾਂ ਆਪਾ ਕਲਾਕਾਰਾਂ ਨੂੰ ਮਿਲਣ ਚੱਲਾਂਗੇ । ਪਰ ਜਸਵਿੰਦਰ ਨੇ ਹੁਣ ਮੁੜ ਕੇ ਨਹੀਂ ਆਉਣਾ ।

        ਮੈਨੂੰ ਇਹ ਗੱਲ ਲਿਖਣ ਵਿੱਚ ਕੋਈ ਝਿਜਕ ਨਹੀਂ ਕਿ ਪਹਿਲਾਂ ਉਹਦੇ ਪਿੰਡ ਨੰਦਗੜ੍ਹ ਦੇ ਹੀ ਕੁੱਝ ਲੋਕ ਉਸ ਨੂੰ ਸ਼ਰਾਬੀ ਕਬਾਬੀ ਬੰਦਾ ਦੱਸਦੇ ਹੁੰਦੇ ਸਨ । ਪਰ ਹੁਣ ਉਹਦੀ ਕੁਰਬਾਨੀ ਨੂੰ ਯਾਦ ਕਰਕੇ ਰੋਂਦੇ ਆ । ਨੰਦਗੜ੍ਹ ਪਿੰਡ ਦੇ ਲੋਕਾਂ ਨੂੰ ਇਹ ਮਾਣ ਹੋਵੇਗਾ ਕਿ ਜਦੋਂ ਕਿਸਾਨੀ ਸੰਘਰਸ਼ ਦਾ ਇਤਹਾਸ ਸੁਨਿਹਰੀ ਪੰਨਿਆਂ ਤੇ ਲਿਖਿਆ ਜਾਵੇਗਾ ਤਾਂ ਉਦੋਂ ਪਿੰਡ ਨੰਦਗੜ੍ਹ ਦਾ ਨਾਂ  ਹਰ ਥਾਂ ਤੇ ਬੋਲੂਗਾ । 

          ਜਸਵਿੰਦਰ ਸਿੰਘ ਨੰਦਗੜ੍ਹ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦਾ ਸਿਰਕੱਢ ਨੇਤਾ ਸੀ ਤੇ ਪਾਰਟੀ ਪ੍ਰਤੀ ਉਹਨਾਂ ਦੀਆਂ ਸ਼ਾਨਦਾਰ ਸੇਵਾਵਾਂ ਹਨ । ਜਦੋਂ 1989 ਵਿੱਚ ਚੋਣਾਂ ਦੌਰਾਨ ਅਕਾਲੀ ਦਲ ਵਾਲਿਆਂ ਨੂੰ ਕੋਈ ਪਿੰਡਾਂ ਵਿੱਚ ਨਹੀਂ ਵੜਨ ਦਿੰਦਾ ਸੀ ਤੇ ਸਾਰੇ ਮੈਬਰ ਪਾਰਲੀਮੈਟ ਮਾਨ ਦਲ ਦੇ ਬਣ ਗਏ ਸਨ ਤਾਂ ਉਸ ਵੇਲੇ ਜਸਵਿੰਦਰ ਸਿੰਘ ਵਰਗੇ ਨੋਜਵਾਨ ਹੀ ਅਕਾਲੀ ਦਲ ਦੀ ਢਾਲ ਬਣਕੇ ਖੜ੍ਹੇ ਸਨ । ਹੁਣ ਅਕਾਲੀ ਦਲ ਨੂੰ ਵੀ ਜਸਵਿੰਦਰ ਸਿੰਘ ਨੰਦਗੜ੍ਹ ਦੀ ਕੁਰਬਾਨੀ ਭੁੱਲਣੀ ਨਹੀਂ ਚਾਹੀਦੀ ।

       ਸਾਨੂੰ ਬੜਾ ਮਾਣ ਹੈ ਜਸਵਿੰਦਰ ਸਿੰਘ ਨੰਦਗੜ੍ਹ ਦੀ ਸ਼ਹੀਦੀ ਤੇ , ਕਿਉਂਕਿ ਉਹਨਾਂ ਨੇ ਕਿਸਾਨੀ ਘੋਲ ਲਈ ਆਪਣੀ ਕੁਰਬਾਨੀ ਦੇ ਕੇ ਪੂਰੇ ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ ਦਾ ਨਾਮ ਉੱਚਾ ਕੀਤਾ ਹੈ । ਸਲਾਮ ਹੈ ਸਾਡੇ ਇਸ ਦੋਸਤ ਨੂੰ । ਹਮੇਸ਼ਾਂ ਦਿਲ ਵਿੱਚ ਵੱਸਦਾ ਰਹੇਗਾ ।

------------------------------------

ਸੁਖਪਾਲ ਸਿੰਘ ਢਿੱਲੋਂ

ਮੋਬਾਈਲ ਨੰਬਰ -9815288208

Post a Comment

0 Comments
* Please Don't Spam Here. All the Comments are Reviewed by Admin.