ਪਿੰਡ ਭਲਾਈਆਣਾ ਵਿਖੇ ਐਤਵਾਰ ਨੂੰ ਲੱਗੇਗੀ ਬੱਕਰੀਆਂ ਦੀ ਮੰਡੀ

ਸ੍ਰੀ ਮੁਕਤਸਰ ਸਾਹਿਬ :

ਬੱਕਰੀ ਪਾਲਣ ਕਿੱਤੇ ਨੂੰ ਹੋਰ ਪ੍ਰਫੁੱਲਿਤ ਕਰਨ ਲਈ ਨੌਜਵਾਨ ਕਿਸਾਨ ਕਲੱਬ ਭਲਾਈਆਣਾ, ਪੰਜਾਬ ਗੌਟ ਐਸੋਸੀਏਸ਼ਨ ਅਤੇ ਫੂਲੇਵਾਲਾ ਬੱਕਰਾ ਮੇਲਾ ਕਮੇਟੀ ਵੱਲੋਂ ਪਿੰਡ ਭਲਾਈਆਣਾ ਵਿਖੇ 19 ਮਾਰਚ ਦਿਨ ਐਤਵਾਰ ਨੂੰ ਬੱਕਰੀਆਂ ਦੀ ਮੰਡੀ ਸ਼ੁਰੂ ਕੀਤੀ ਜਾ ਰਹੀ ਹੈ। ਇਸ ਮੰਡੀ ਵਿੱਚ ਬੱਕਰੀ ਪਾਲਕ ਵੱਡੀ ਗਿਣਤੀ ’ਚ ਬੀਟਲ ਨਸਲ, ਬਰਬਰੀ ਨਸਲ ਅਤੇ ਦੇਸੀ ਨਸਲ ਦੀਆਂ ਬੱਕਰੀਆਂ ਲੈ ਕੇ ਪਹੁੰਚ ਰਹੇ ਹਨ। ਮੰਡੀ ਵਿੱਚ ਪੰਜਾਬ, ਹਰਿਆਣਾ, ਰਾਜਸਥਾਨ, ਜੰਮੂ ਤੋਂ ਵੱਡੇ ਵਪਾਰੀ ਖਰੀਦ ਵੇਚ ਲਈ ਪਹੁੰਚਣਗੇ। ਮੰਡੀ ’ਚ ਆਉਣ ਵਾਲੇ ਬੱਕਰੀ ਪਾਲਕਾਂ ਅਤੇ ਵਪਾਰੀਆਂ ਲਈ ਚਾਹ ਪਾਣੀ ਅਤੇ ਲੰਗਰ ਦਾ ਵਧੀਆ ਪ੍ਰਬੰਧ ਹੋਵੇਗਾ। ਭਲਾਈਆਣਾ ਬੱਕਰਾ ਮੰਡੀ ਹਰ ਐਤਵਾਰ ਨੂੰ ਲੱਗਿਆ ਕਰੇਗੀ। ਮੰਡੀ ’ਚ ਹਰ ਮਹੀਨੇ ਨਵੇਂ ਬੱਕਰੀ ਪਾਲਕਾਂ ਨੂੰ ਟ੍ਰੇਨਿੰਗ ਦਿੱਤੀ ਜਾਵੇਗੀ। ਇਸ ਮੰਡੀ ਨੂੰ ਕਾਮਯਾਬ ਕਰਨ ਪੰਜਾਬ ਗੌਟ ਐਸੋਸੀਏਸ਼ਨ ਅਤੇ ਸ੍ਰੀ ਇੰਦਰਜੀਤ ਸਿੰਘ ਮਾਨ ,ਚੇਅਰਮੈਨ ਪੰਜਾਬ ਖਾਦੀ ਅਤੇ ਗ੍ਰਾਮ ਉਦਯੋਗ ਬੋਰਡ ਦਾ ਵਿਸ਼ੇਸ਼ ਯੋਗਦਾਨ ਰਹੇਗਾ। ਇਸ ਸਬੰਧੀ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮੰਡੀ ਪ੍ਰਬੰਧਕ ਜਗਮੀਤ ਸਿੰਘ ਭਲਾਈਆਣਾ, ਰਾਜਵੀਰ ਸਿੰਘ ਕੋਠੇ ਕੌਰ ਸਿੰਘ ਵਾਲੇ ਨੇ ਦੱਸਿਆ ਕਿ ਅੱਜ ਦੇ ਸਮੇਂ ਨੌਜਵਾਨਾਂ ਨੂੰ ਨਸ਼ਿਆਂ ਦੀ ਦਲਦਲ ’ਚੋਂ ਕੱਢਣ ਲਈ ਬੱਕਰੀ ਪਾਲਣ ਵਰਗੇ ਸਹਾਇਕ ਕਿੱਤਿਆਂ ਨੂੰ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ, ਸਾਡੀ ਹਮੇਸ਼ਾ ਇਹ ਕੋਸ਼ਿਸ਼ ਰਹੇਗੀ ਕਿ ਛੋਟੇ ਕਿਸਾਨਾਂ, ਬੇਰੁਜ਼ਗਾਰ ਨੌਜਵਾਨਾਂ ਤੇ ਨਵੇਂ ਬੱਕਰੀ ਪਾਲਕਾਂ ਦੀ ਮੱਦਦ ਕਰਕੇ ਉਨ੍ਹਾਂ ਨੂੰ ਇਸ ਕਿੱਤੇ ’ਚ ਸਫਲਤਾ ਦਵਾ ਸਕੀਏ।