ਵਿਆਹ ਦਾ ਝਾਂਸਾ ਦੇ ਕੇ ਠੱਗੇ ਸਾਡੇ ਸੱਤ ਲੱਖ, ਅੱਠ ਨਾਮਜਦ 

ਸ੍ਰੀ ਮੁਕਤਸਰ ਸਾਹਿਬ : ਵਿਆਹ ਦਾ ਝਾਂਸਾ ਦੇ ਕੇ ਇਕ ਵਿਅਕਤੀ ਨਾਲ ਅੱਠ ਲੋਕਾਂ ਨੇ 7 ਲੱਖ 50 ਹਜ਼ਾਰ ਰੁਪਏ ਦੀ ਠੱਗੀ ਮਾਰ ਲਈ। ਪੁਲਿਸ ਵੱਲੋਂ ਅੱਠ ਜਣਿਆਂ ਵਿਰੁੱਧ ਧੋਖਾਧੜੀ ਦਾ ਮਾਮਲਾ ਦਰਜ਼ ਕਰ ਲਿਆ ਹੈ ਜਦਕਿ ਗ੍ਰਿਫ਼ਤਾਰੀ ਅਜੇ ਬਾਕੀ ਹੈ। ਇਸ ਸਬੰਧੀ ਐਸਐਸਪੀ ਸ੍ਰੀ ਮੁਕਤਸਰ ਸਾਹਿਬ ਨੂੰ ਦਿੱਤੀ ਸ਼ਿਕਾਇਤ ’ਚ ਗੁਰਨਾਮ ਸਿੰਘ ਪੁੱਤਰ ਪ੍ਰੀਤਮ ਸਿੰਘ ਵਾਸੀ ਪਿੰਡ ਔਲਖ ਨੇ ਦੱਸਿਆ ਕਿ ਮੈਂ ਆਪਣੇ ਲੜਕੇ ਕੁਲਵਿੰਦਰ ਸਿੰਘ ਦਾ ਵਿਆਹ ਕਰਨਾ ਚਾਹੁੰਦਾ ਸੀ। ਇਸ ਸਬੰਧੀ ਉਸਦੀ ਗੱਲਬਾਤ ਵਿਚੋਲੇ ਧਰਮਪਾਲ ਸਿੰਘ ਵਾਸੀ ਗੋਨਿਆਣਾ ਜ਼ਿਲ੍ਹਾ ਬਠਿੰਡਾ ਅਤੇ ਸੁਭਾਸ਼ ਸਿੰਘ ਵਾਸੀ ਕੇਹਰ ਸਿੰਘ ਦੀਆਂ ਢਾਣੀਆਂ ਮੁਕਤਸਰ ਨਾਲ ਹੋਈ। ਜਿਨ੍ਹਾਂ ਨੇ ਕਿਹਾ ਕਿ ਉਸਦੇ ਲੜਕੇ ਦਾ ਵਿਆਹ ਮਨਪ੍ਰੀਤ ਕੌਰ ਵਾਸੀ ਫਗਵਾੜਾ ਨਾਲ ਕਰਵਾ ਦਿੰਦੇ ਹਾਂ। ਇਸਦੇ ਲਈ ਮਨਪ੍ਰੀਤ ਕੌਰ ਦੇ ਭਰਾ ਸਤਵਿੰਦਰ ਸਿੰਘ ਨੇ ਵਿਆਹ ਦੇ ਖਰਚੇ ਵਾਸਤੇ ਉਸਤੋਂ 7,50,000 ਰੁਪਏ ਲੈ ਲਏ। ਉਕਤ ਵਿਚੋਲਿਆ ਨੇ ਖਰਚੇ ਦੇ ਲਏ ਗਏ ਪੈਸਿਆਂ ਦਾ ਸਤਵਿੰਦਰ ਸਿੰਘ ਤੋਂ ਐਫੀਡੇਵਟ ਦਿਵਾਇਆ। ਇਸਤੋਂ ਬਾਅਦ ਮਨਪ੍ਰੀਤ ਕੌਰ ਨੇ ਸੁਭਾਸ਼ ਸਿੰਘ ਦੇ ਫੋਨ ’ਤੇ ਨੰਬਰ ਲਗਾ ਕੇ ਕਾਨਫਰੰਸ ਜਰੀਏ ਉਸ ਨਾਲ (ਗੁਰਨਾਮ) ਗੱਲਬਾਤ ਕੀਤੀ, ਤੇ ਕਿਹਾ ਕਿ ਸਤਵਿੰਦਰ ਸਿੰਘ 4 ਲੱਖ ਰੁਪਏ ਨੱਪ ਗਿਆ ਹੈ। ਉਸਤੋਂ 4 ਲੱਖ ਰੁਪਏ ਕਢਵਾਓ। ਗੁਰਨਾਮ ਨੇ ਦੱਸਿਆ ਕਿ ਮੈਂ ਚਾਰ ਪੰਜ ਦਿਨ ਲਗਾਤਾਰ ਸਤਵਿੰਦਰ ਨੂੰ ਫੋਨ ਕਰਦਾ ਰਿਹਾ ਜਿਸਤੋਂ ਬਾਅਦ 14\02\2022 ਨੂੰ ਸਤਵਿੰਦਰ ਨੇ ਮੇਰੇ ਖਾਤੇ ਵਿੱਚ 4 ਲੱਖ ਰੁਪਏ ਪਾ ਦਿੱਤੇ। ਇਸਤੋਂ ਬਾਅਦ ਫਿਰ ਮਨਪ੍ਰੀਤ ਕੌਰ ਨੇ ਕਾਨਫਰੰਸ ਰਾਹੀਂ ਗੱਲਬਾਤ ਕੀਤੀ ਅਤੇ ਇਹ ਕਿਹਾ ਕਿ ਸਤਵਿੰਦਰ ਸਿੰਘ ਇਸ ਵਿਆਹ ਤੋਂ ਖੁਸ਼ ਨਹੀਂ ਹੈ ਅਤੇ ਮੇਰਾ ਮਾਮਾ ਆਰਮੀ ’ਚ ਅੰਬਾਲੇ ਵਿੱਚ ਅਫ਼ਸਰ ਹੈ। ਜਿਸਤੋਂ ਬਾਅਦ ਉਸਦੇ ਆਰਮੀ ਵਾਲੇ ਮਾਮੇ ਪ੍ਰਭਜੀਤ ਦਾ ਫੋਨ ਆਇਆ ਕਿ ਸਤਵਿੰਦਰ ਮੇਰਾ ਭਣਜਾ ਹੈ ਅਤੇ ਅਸੀਂ ਸਾਰੇ ਇਕੱਠੇ ਹਾਂ ਤੇ ਧੂਮਧਾਮ ਨਾਲ ਵਿਆਹ ਕਰਾਂਗੇ। ਇਸਤੋਂ ਬਾਅਦ ਉਸ ਆਰਮੀ ਅਫ਼ਸਰ ਨੇ ਫੋਨ ਕੀਤਾ ਕਿ ਮਨਪ੍ਰੀਤ ਕੌਰ ਨੇ ਸਾਪਿੰਗ ਕਰਨੀ ਹੈ ਤੇ ਉਸਨੂੰ 70 ਹਜ਼ਾਰ ਰੁਪਏ ਦੀ ਲੋੜ ਹੈ। ਇਸਤੋਂ ਬਾਅਦ ਆਰਮੀ ਅਫ਼ਸਰ ਦਾ ਮੁੰਡਾ ਯਾਦਵਿੰਦਰ ਆ ਕੇ ਉਸਤੋਂ 70 ਹਜ਼ਾਰ ਰੁਪਏ ਲੈ ਗਿਆ। ਇਸਤੋਂ ਬਾਅਦ ਉਹ ਆਰਮੀ ਅਫ਼ਸਰ ਲਗਾਤਾਰ ਫੋਨ ਕਰਦਾ ਰਿਹਾ ਕਿ ਵਿਆਹ ਦੀ ਡੇਟ ਤਾਂ ਫਿਕਸ ਹੋ ਗਈ ਹੈ ਪਰ ਜਿਹੜਾ 4 ਲੱਖ ਰੁਪਏ ਸਤਵਿੰਦਰ ਸਿੰਘ ਨੇ ਤੁਹਾਡੇ ਖਾਤੇ ’ਚ ਪਾਏ ਹਨ ਉਹ ਸਾਨੂੰ ਨਗਦ ਦੇ ਦਿਓ। ਗੁਰਨਾਮ ਨੇ ਦੱਸਿਆ ਮੈਂ ਉਸਨੂੰ ਇਹ ਕਿਹਾ ਕਿ 70 ਹਜ਼ਾਰ ਰੁਪਏ ਤੇਰਾ ਮੁੰਡਾ ਲੈ ਗਿਆ ਅਤੇ 3 ਲੱਖ ਦਾ ਚੈੱਕ ਲੈ ਲਓ ਤਾਂ ਉਸਨੇ ਇਹ ਕਿਹਾ ਕਿ ਟਾਈਮ ਥੋੜਾ ਹੈ ਤੁਸੀਂ ਪੈਸੇ ਨਗਦ ਕਢਵਾ ਦਿਓ ਕਿਉਂਕਿ ਅਸੀਂ ਮੋਗੇ ਪੈਲਿਸ ਬੁੱਕ ਕਰਵਾਉਣਾ ਹੈ। ਗੁਰਨਾਮ ਨੇ ਦੱਸਿਆ ਕਿ ਉਸਤੋਂ ਬਾਅਦ ਵਿਆਹ ਦੀ ਤਰੀਕ 05\03\2022 ਪੱਕੀ ਕਰ ਦਿੱਤੀ ਤੇ ਉਸਤੋਂ ਬਾਅਦ ਆਰਮੀ ਅਫ਼ਸਰ ਦਾ ਮੁੰਡਾ ਯਾਦਵਿੰਦਰ ਸਿੰਘ ਤੇ ਉਸਦੀ ਮੰਮੀ ਸਾਡੇ ਘਰ ਸਾਹੇ ਚਿੱਠੀ ਲੈ ਕੇ ਆਏ ਅਤੇ ਉਸਦੇ ਕੋਲੋਂ 3 ਲੱਖ ਰੁਪਏ ਨਗਦ ਲੈ ਗਏ। ਇਸਤੋਂ ਬਾਅਦ ਆਰਮੀ ਅਫ਼ਸਰ ਦੇ ਮੁੰਡੇ ਯਾਦਵਿੰਦਰ ਨੇ ਮੇਰਾ ਫੋਨ ਬਲੈਕ ਲਿਸਟ ’ਚ ਪਾ ਦਿੱਤਾ। ਵਿਚੋਲੇ ਵੀ ਫੋਨ ਚੁੱਕਣੋਂ ਹੱਟ ਗਏ। ਜਿਸਤੋਂ ਬਾਅਦ ਉਹ ਕਾਫ਼ੀ ਪ੍ਰੇਸ਼ਾਨ ਹੋ ਗਿਆ। ਉਸਨੇ ਦੱਸਿਆ ਕਿ ਉਕਤਾਨ ਲੋਕਾਂ ਨੇ ਆਪਸ ’ਚ ਸਾਜ ਬਾਜ ਹੋ ਕੇ ਉਸ ਨਾਲ 7 ਲੱਖ 50 ਹਜ਼ਾਰ ਰੁਪਏ ਦੀ ਠੱਗੀ ਮਾਰ ਲਈ ਹੈ। ਇਸਤੇ ਪੁਲਿਸ ਵੱਲੋਂ ਬਾਰੀਕੀ ਨਾਲ ਜਾਂਚ ਪੜਤਾਲ ਕਰਨ ਤੋਂ ਬਾਅਦ ਥਾਣਾ ਸਦਰ ਮਲੋਟ ਵਿਖੇ ਰੀਤੂ ਭਾਟੀਆ ਪਤਨੀ ਸੁਨੀਲ ਕੁਮਾਰ, ਸਤਵਿੰਦਰ ਸਿੰਘ ਪੁੱਤਰ ਅਜੀਤ ਸਿੰਘ ਵਾਸੀ ਪੱਕਾ ਦਰਵਾਜ਼ਾ ਗੁਰਾਇਆ ਜ਼ਿਲ੍ਹਾ ਜਲੰਧਰ, ਰਿੰਕੀ ਉਰਫ ਮਨਪ੍ਰੀਤ ਕੌਰ ਉਰਫ ਤਨਵੀਰ ਕੌਰ ਪਤਨੀ ਰਾਜਨ ਕੁਮਾਰ ਵਾਸੀ ਮਹਿਲ ਗਿਹਲਾ, ਨਿਧੀ ਪਤਨੀ ਅਵਿਨਾਸ਼ ਕੁਮਾਰ ਵਾਸੀ ਗੁਰਾਇਆ, ਪ੍ਰਭਜੀਤ ਸਿੰਘ (ਆਰਮੀ ਅਫ਼ਸਰ) ਪੁੱਤਰ ਇੰਦਰਜੀਤ ਸਿੰਘ ਵਾਸੀ ਅਰਬਨ ਸਟੇਟ ਫਗਵਾੜਾ, ਪਰਮਿੰਦਰ ਸਿੰਘ ਉਰਫ ਪੰਮੀ ਵਾਸੀ ਬੋਪਾਰਾਏ, ਸੁਭਾਸ਼ ਪੁੱਤਰ ਬਾਜ ਸਿੰਘ ਵਾਸੀ ਪਿੰਡ ਚੱਕ ਵਣਵਾਲਾ ਜ਼ਿਲ੍ਹਾ ਫਾਜ਼ਿਲਕਾ, ਧਰਮਪਾਲ ਸਿੰਘ ਪੁੱਤਰ ਸੁਰਜੀਤ ਸਿੰਘ ਵਾਸੀ ਗੋਨਿਆਣਾ ਜ਼ਿਲ੍ਹਾ ਬਠਿੰਡਾ ਦੇ ਖਿਲਾਫ਼ ਧਾਰਾ 420,120ਬੀ ਆਈਪੀਸੀ ਤਹਿਤ ਮੁਕੱਦਮਾ ਦਰਜ਼ ਕਰ ਲਿਆ ਹੈ ਜਦਕਿ ਗ੍ਰਿਫਤਾਰੀ ਅਜੇ ਬਾਕੀ ਹੈ।